ബാച്ചിലർ റൂമിൽ താമസിക്കുന്ന കാലം. റൂമിനകത്ത് പുക വലിച്ച് മറ്റുള്ളവരെയെല്ലാം വെറുപ്പിക്കുന്നത് ചിലരുടെ വിനോദമാണ്. അങ്ങിനെയൊരു ഷിബു ഞങ്ങളുടെ റൂമിലും ഉണ്ടായിരുന്നു. പുകവലിക്കാരെ ഒതുക്കാൻ യൂടൂബിൽ ഒരു വീഡിയോ ഞങ്ങൾ കണ്ടിരുന്നു. അത് പ്രകാരം ഷിബുവിൻറെ സിഗരറ്റ് കൂടിൽ നിന്നും ഒരു 555 ഫിൽറ്റർ ചൂണ്ടി, പുകയിലയെല്ലാം ഒരു ചെറിയ കമ്പ് കൊണ്ട് പുറത്ത് എടുത്ത് അതിൽ തീപ്പെട്ടി മരുന്ന് മിശ്രിതം നിറച്ച് വീണ്ടും അറിയാത്ത പോലെ സിഗരറ്റ് കൂട്ടിലേക്ക് വെച്ച് ഷിബുവിനെ കാത്തിരുന്നു. ഷിബു വന്നതും ഒരു സിഗരറ്റ് എടുത്ത് വലിക്കാൻ തുടങ്ങി ... ഞങ്ങൾ മനസ്സിൽ ചിരി ഒതുക്കി ഒരു പൊട്ടിതെറിയും പ്രതീക്ഷിച്ച് രണ്ടു ചെവികളും കൂർപിച്ചിരുന്നു. (((((((((ശ്ശ്ശ്ശ്ശ്ശ്ശ്ശ്ശ്)))))))))) ഒന്നും സംഭവിച്ചില്ല. സിഗരറ്റ് കൂട്ടിൽ നിറച്ചും സിഗരറ്റ് ഇരുന്നതിനാൽ ഞങ്ങൾ ഒളിപ്പിച്ച സിഗരറ്റ് ബോംബ്‌ മാറി പോയി. ഇനി അര മണിക്കൂർ കൂടി വെയിറ്റ് ചെയ്യണം. അടുത്ത വലി തുടങ്ങാൻ. ഞങ്ങൾ അക്ഷമരായി കാത്തിരുന്നു. (((((((((ശ്ശ്ശ്ശ്ശ്ശ്ശ്ശ്ശ്)))))))))) ഒന്നും സംഭവിച്ചില്ല. ഞങ്ങളുടെ ക്ഷമ കെട്ടു. ഇനി രാവിലെ പ്രഭാതം പൊട്ടി വിടരുമ്പോൾ ചിരിക്കാം എന്ന് മനസ്സിൽ പറഞ്ഞു കിടന്നു.
പിറ്റേ ദിവസം രാവിലെ പ്രഭാതം പൊട്ടി വിരിഞ്ഞത് അടുത്ത ഫ്ലാറ്റിലെ ബാച്ചിലർ ടോയിലെറ്റിൽ ആയിരുന്നു. അപ്പോഴും നമ്മുടെ കഥാപാത്രം ഷിബു റൂമിൽ കൂർക്കം വലിച്ചു കിടന്നുറങ്ങുകയായിരുന്നു. അതെങ്ങനെ സംഭവിച്ചു എന്ന് ഒരു പിടിയും കിട്ടുന്നില്ല.